Быйылгы үөрэх дьыла олус кэрэ, үөрүүлээх сонуннаах саҕаланна. Ол курдук, биһиги оскуолабыт 4 «г» кылааһын үөрэнээччилэрэ бу дьыл алтынньы 4-10 күннэригэр Санкт-Петербург куоракка ыытыллыбыт IV Аан дойдутааҕы «Салют талантов» музыкальнай фестивальга «Инструментальное и музыкальное творчество» хайысхаҕа II степеннээх Гран-При хаһаайыттарын үрдүк аатын ылан үөрэнэр оскуолаларын, төрөөбүт дойдуларын аар-саарга аатырдан кэллилэр. Оҕолору бу үрдүк ситиһиигэ дьарыктаан илдьэ сырыттылар: кылаас салайааччыта, Российскай Федерация уопсай үөрэхтээһинин бочуоттаах үлэһитэ, РФ президенин Гранын кыайыылааҕа Петрова Галина Михайловна, фольклорга художественнай салайааччы Жиркова Туяра Анатольевна, үҥкүү кэрэ эйгэтигэр уһуйааччы, төрөппүт Дмитриева Лилия Петровна. Аан дойдутааҕы фестиваль суперфиналыгар Россия 9 араас куоратыгар ыытыллыбыт көрүү-күрэхтэр кыайыылаахтара мустан бэйэлэрин талааннарын үрдүк таһымнаах дьүүллүр сүбэ иннигэр көрдөрдүлэр. Бу иннинэ биһиги талааннаах оҕолорбут Сочи куоракка сайын ыытыллыбыт «На творческом Олимпе» фестивальга I уонна II степеннээх лауреат аатын ыланнар, суперфиналга ыҥырыы тутан, дойдуларын чиэстээхтик ааттатан кэллилэр. Хас да күннээх көрүү түмүгүнэн, 98 коллектив кыттыбыттыттан, биһиги оҕолорбут чахчы чаҕылхай талааннаахтарын 5 киһиттэн састааптаах дьүүллүүр сүбэ (Мариинскай театр биллэр артыыстара, диржердара, солистара) биир санаанан үрдүктүк сыаналаата. Оҕолорбут көстүүмнэрэ, сценаҕа тутта-хапта сылдьыылара, музыкальнай инструмены баһылаабыттара, киһи уйулҕатын уһугуннаран, Сахабыт сирин айылҕатын дьиктитин истэн олорор дьоҥҥо харахтарыгар көстөр гына оонньообуттара дьүүллүүр сүбэнэн бэлиэтэннэ. Кырачаан артыыстарбыт хомуска дьүрүһүтэн оонньообуттара, кырыымпа кылыһахтаах куолаһын улахан сценаҕа тыаһаппыттара, сахалыы оһуохайы эҥэриттэн тардыбыттара үрдүк сыанабылы ылбытынан киэн туттабыт. Инникитин да, ылбыт тэтимнэрин ыһыктыбакка, төрөөбүт төрүт культураларын бар дьонноругар тиэрдэ, араас омук дьонугар билиһиннэрэ туруохтара диэн эрэнэбит, өссө да саҥаттан саҥа дабайыылары баҕарабыт.
Сахалыы тыллаах алык кылаас учууталларын МХ салайааччыта Тарбахова С.Г.
