«Дьиэ кэргэнинэн ааҕыы- сайдыыга тирэх» күрэх бииргэ ситимниир

«Дьиэ кэргэнинэн ааҕыы- сайдыыга тирэх» күрэх бииргэ ситимниир

1973
0
ПОДЕЛИТЬСЯ

Дьокуускай куорат 17с нүөмэрдээх оскуолатыгар  «Дьиэ кэргэнинэн ааҕыы- сайдыыга тирэх» күрэх сэтинньи ый 13 күнүгэр түмүктэннэ. Ыытыллыбыт тэрээһин сыала — соруга: дьиэ кэргэнинэн ааҕыы үгэстэрин тэрийэн саха суруйааччыларын айымньыларынан оҕолору үтүө санааҕа  иитии буолар. Бу сонун, интэриэһинэй тэрээһини саха тылын уонна литературатын учууталлара, оскуола иитэр үлэҕэ салаата, библиотеката тэрийэн ыыттылар.

Күрэххэ 4-6 кылаас үөрэнээччилэрэ дьиэ- кэргэн сөбүлүүр  поэтын айымньытын хоһоонноохтук аахтылар, билиһиннэрдилэр.  Күрэххэ үлэлэри видеоҕа устан дьүүллүүр сүбэҕэ ыыттылар. Габышева Ангелина  (4в) ийэтинээн  биир дойдулаахтарын суруйааччы Иннокентий Сосины иһирэхтик сырдаттылар, «Хотугу сулус» хоһоонун аахтылар. Сайаана Таппырова (5в) ийэтинээн Иннокентий Левин – – Лыҥкый  «Таабырын»  айымньытын бэрт сатабыллаахтык истээччигэ тиэртилэр.  Туйаара, Ньургуйаана Третьяковалар дьиэ- кэргэнинэн (4в, 6г) бу күрэххэ олус кыһаллан бэлэмнэммиттэр. Кинилэр биир дойдулаахтарын Иннокентий Артамонов туһунан элбэх матырыйаалы хомуйбуттар. Поэт «Чугдаара ыллаата» хоһоонун айымньылаахтык аахтылар.  Манна дьиэ- кэргэн эбэтэ  актыыбынай кыттыыны ылбыта кэрэхсэннэ. 4 «г»  кылаас үөрэнээччитэ Охлопкова Сандаара дьиэ- кэргэнэ толору састаабынан кыттыбыта сэҥээриини ылла. Кинилэр И. Артамонов  «Бэс ыйын 22  күнэ» хоһоонун умсугутуулаахтык аахтылар. Оттон 6 «г» кылаас үөрэнээччитэ Ноговицына Дайаана аҕатынаан норуот суруйааччыта П.Н. Харитонов-Ойуку туһунан сырдаттылар, сөбүлүүр хоһооннорун иһирэхтик ааҕан иһитиннэрдилэр.

Күрэх түмүгэ маннык буолла:

«Тереебут дойдуга бэриниилээх дьиэ- кэргэн»  анал ааты ылла  Габышевтар дьиэ-кэргэн;

«Кинигэ доҕордоох дьиэ-кэргэн» анал аат-  Ноговицыннар дьиэ-кэргэн.

1 миэстэ- Третьяковтар дьиэ- кэргэн (18баал) ;

2 миэстэ Охлопковтар дьиэ- кэргэн (16 баал);

3 миэстэ-  Таппыровтар дьиэ- кэргэн (13 баал).

Интернет ситимин нөҥүө санаа атастаһыытыгар кыттааччылар маннык тэрээһин дьиэ-кэргэни түмэр, ааҕыыга көҕүлүүр уонна билиигэ угуйар күүһүн  астына бэлиэтээтилэр.

Николай Максимович, Иза Агитовна, Айсен, Саяна, Сандаара Охлопковтар:

«Дьиэ кэргэнинэн аагыы- сайдыыга тирэх»  курэги биьиги Охлопковтар олус сэргээбиппит. Кинигэ аагарбытын сөбүлүүр буоламмыт, кыттарга быһаарыммыппыт. Мин бэйэм Уус-Алдантан төрүттээхпин. Бары Уус- Алданы наһаа сөбүлүүбүт, айылҕатын, дьонун- сэргэтин. Биир киэн туттар дойдулаахпыт- суруйааччы, поэт Иннокентий Иванович Артамонов буолар. Аҕа Дойду улуу сэриитин кыттыылааҕа. Бу маннык курэхтэр оголору ааҕыыга умсугуталлар, сахалыы тылларын байыталларыгар, сайыннаралларыгар, өссө элбэҕи билэллэригэр, сайдыыга тирэх буолаллар. Маннык күрэх хамсык бириэмэтигэр дьиэ кэргэни бииргэ холбуур, ситимниир дии саныыбыт».

Анна Таппырова, 5 в кылаас төрөппүтэ:

«Биьиги Таппыровтар дьиэ-кэргэн оскуола иьинэн ыытыллыбыт «Дьиэ-кэргэнинэн ааҕыы – сайдыыга тирэх» күрэххэ быйыл бастакыбытын кытынныбыт. Курэх балаһыанньатын көрөн баран тута үөрэппит учууталым, поэт, прозаик, критик Иннокентий Наумович Левин – Лыҥкый аатын үйэтитэн кини хоһоонунан кыттарга санаммыппыт.

Маннык тэттик, оҕону сайыннарар, саха литературатыгар интэриэһи үөскэтэр күрэхтэр олус наадалаахтар диэн саныыбын. Айар күрэхтэр оҕо сахалыы үчүгэйдик саҥарарыгар, санаатын этэ үөрэнэригэр, литература тылын баһылыырыгар көмө буолар.  Оҕо бэйэтэ сөбүлүүр, ааҕар суруйааччытын туһунан бииргэ үөрэнэр оҕолоругар, киэҥ араҥаҕа билиһиннэрэрэ эмиэ кэрэхсэбиллээх.  Оҕону сахалыы эйгэҕэ иитии, сыһыарыы барыта кыраттан, дьиэ-кэргэнтэн саҕаланар, онон оскуола коллективыгар, чуолаан курэҕи ыыппыт тэрийэр бөлөххө биһиги дьиэ-кэргэн аатыттан махталбытын тириэрдэбит.

Инникитин да маннык курэхтэр баар буолуохтара, элбэх оҕо, төрөппүт интэриэһин тардыахтара диэн бигэ эрэллээхпит!»

Кыттааччылар бэлиэтээбиттэрин курдук, маннык тэрээһиннэр оҕо бэйэтин дьиэ кэргэнин, дьонун кытта чугас сыһыаннаах буоларыгар, бэйэтин норуотун суруйааччыларын, талааннаах дьонун  дириҥник билэригэр  туһата улахан. Куорат сиригэр иитиллэр, улаатар кэнчээри ыччаты төрөөбүт тылынан сөпкө саҥарар, сайыннарар, иитэр – үөрэтэр  үлэни ыытар, тэрийэр — биһиги үлэбит сүрүн сыала буолар.

Күрэх бары кыттааччыларыгар актыыбынайдык кыттыбыттарын иһин махталбытын тиэрдэбит, өссө ситиһиилэри баҕарабыт!

Тэрийэр бөлөх

Третьяковтар дьиэ-кэргэн

Ноговицыннар дьиэ-кэргэн

 

Охлопковтар дьиэ-кэргэн

Таппыровтар дьиэ-кэргэнГабышевтар дьиэ-кэргэн

 

 

НЕТ КОММЕНТАРИЕВ

Comments are closed.